Feliz ano 2019 a todas e a todos !!! A primeira entrada deste novo ano recolle a fantástica charla de Xosé Santos Otero. Durante preto dunha hora e media, o alumnado de Cultura Científica de 1º de Bacharelato tivo a oportunidade de participar do saber e bo facer deste Axente Forestal da Consellería de Medio Rural da Xunta de Galicia. Como moi ben di o propio Xosé Santos «veño de familia de contacontos, o que non quere dicir que viva do conto».
A charla estivo acompañada por unha presentación na que destacaban imaxes impactantes, tomadas polo poñente, que reflicten a realidade de moitas xestións controvertidas dos recursos naturais da provincia e da comunidade autónoma.
Xosé Santos animounos a participar de xeito activo no coidado do medio, e convidou ó alumnado a sair ó monte e descubrir a diversidade dos nosos recursos naturais.
Agardamos poder tomarlle a palabra en pouco tempo. Deste xeito tentaremos darlle continuidade a esta charla, organizada polo Seminario de Ciencias Experimentais do centro, cunha saída ó entorno na que poidamos seguir aproveitando a sabeduría deste valorado divulgador e defensor da natureza.
