O tramo do sendeiro entre o Castro de Santomé e a central hidroeléctrica de Castadón continúa nun estado de absoluto abandono. De feito, unha das alumnas resultou mancada, afortunadamente de rabuñaduras moi aparatosas pero superficiais, ao caer á beira dereita do sendeiro por un mal apoio ao tentar evitar o crecemento descontrolado da vexetación na beira esquerda. As pontes de madeira próximas á central hidroeléctrica continúan en moi mal estado, e hai que cruzalas con precaución, ao haber varios pontóns podridos e outros, incluídas as barandas, soltos. Durante as semanas previas á realización do roteiro do día 20 de abril o Concello de Ourense foi informado desta situación. Antes de rematar o curso tentaremos que a información chegue ao Concello de Pereiro de Aguiar, onde se atopan os puntos máis conflitivos para o tránsito seguro. Desgrazadamente, as actuacións precisas para garantir a seguridade do alumnado non están a chegar a tempo. Como se pode apreciar nas imaxes, o alumnado ten que transitar por tramos nos que non se ve o camiño, e as posibilidades de mancarse son elevadas.