O alumnado e as mestras e mestres de Ensino Infantil (E.I.) levaron a cabo as seguintes actividades durante o mes de abril de 2026.
VISITA DA MASCOTA.
Texto elaborado pola compañeira Chelo Galiña Gómez.
Durante o mes de abril, o alumnado de E.I. tivo a sorte de recibir unha visita moi especial: coñecimos a Robin, un cadeliño moi cariñoso que, xunto con dous voluntarios da Asociación APMOU, compartiu connosco unha xornada chea de aprendizaxes.
Alumnado de 4º.
Alumnado de 5º.
Alumnado de 6º.
A visita de Robin e dos voluntarios permitiunos achegarnos máis ao mundo dos animais e comprender a responsabilidade que supón coidalos. Grazas a esta experiencia, tomamos conciencia de que debemos tratalos con respecto, ser responsables no seu coidado e nunca abandonalos.
ECOPARQUE INFANTIL MAMÁ MARGARIDA.
Alumnado de 5º.
Alumnado de 6º.
ÁRBORES.
Texto elaborado pola compañeira Chelo Galiña Gómez.
O alumnado de 5º de E.I. está a desenvolver neste trimestre unha nova situación de aprendizaxe centrada nas árbores, un tema que esperta grande curiosidade e interese.
Ao longo destas semanas, fomos descubrindo as distintas partes das árbores e as súas funcións a través de actividades prácticas e significativas. Neste proceso, a colaboración das familias foi fundamental, xa que achegaron materiais moi variados que nos permitiron afondar nos contidos traballados na aula. Grazas a estas achegas, tivemos a oportunidade de observar e manipular cortizas de diferentes árbores, follas de cerdeira e figueira, así como outras follas coas que realizamos pequenas experiencias sensoriais: velas, tocalas e mesmo ulilas.
Para comprender mellor o proceso de xerminación, puxemos en marcha un pequeno sementeiro na aula, no que plantamos sementes de cabaza, garavanzos, lentellas e fabas. Coidámolo cada día con responsabilidade e ilusión, observando a súa evolución e atendendo aos cambios que se van producindo, polo que a aula se converteu nun pequeno espazo de observación. O crecemento destas plantas continuará na horta escolar cando poidamos transplantalas.
ARAÑEIRAS MÁXICAS.
Entre o 13 e o 14 de abril o alumnado de 6º de E.I. participou nunha actividade moi especial relacionada coa educación viaria e o coidado do medio ambiente, apostando pola mobilidade sostible.
Despois de traballar co conto da mochila viaxeira “Arañeiras Máxicas”, os nenos e nenas aprenderon a importancia de desprazarse de maneira responsable e sostible. Como resultado deste aprendizaxe, decidiron poñer en práctica o aprendido e vir ao colexio empregando medios de transporte respectuosos co medio ambiente. Así, durante estes días, puidemos ver como o alumnado chegaba ao centro camiñando, en patinete ou utilizando o transporte público, demostrando un gran compromiso co coidado do planeta.
Nas fotografías pódese observar como cada un deles, ao chegar ao colexio, engadiu unha pegatina nun mural colectivo, simbolizando o seu esforzo e participación nesta iniciativa. Sen dúbida, foi unha experiencia moi enriquecedora que lles permitiu tomar conciencia da importancia de coidar a nosa contorna desde pequenos.
