O alumnado e as mestras e mestres de Ensino Infantil (E.I.) levaron a cabo as seguintes actividades durante o segundo trimestre do curso 2025-2026.
DÍA INTERNACIONAL DA MULLER E DA NENA NA CIENCIA.
Texto elaborado pola compañeira Chelo Galiña Gómez.
O 11 de febreiro celebramos o Día Internacional da Muller e da Nena na Ciencia, unha data moi importante para lembrar que as nenas e as mulleres tamén poden ser grandes científicas e que o seu traballo cambiou e mellora as nosas vidas cada día. O alumnado de Infantil cre na importancia de que todas as persoas teñamos as mesmas oportunidades, sen importar se somos nenos ou nenas. Por iso, quixemos coñecer mellor a algunhas mulleres científicas e inventoras que, co seu esforzo, intelixencia e creatividade, fixeron inventos que melloraron a nosa vida e contribuíron ao avance da ciencia e da tecnoloxía.
Coñecemos e Investigamos sobre nove científicas e inventoras que contribuíron a mellorar o noso mundo:
Mary Anderson, inventora do limpaparabrisas, que nos permite conducir con seguridade cando chove; Josephine Cochrane, creadora do lavavaixelas, que facilita as tarefas do fogar; Letitia Geer, inventora da xiringa moderna, tan importante na medicina; Sarah Mather, creadora do telescopio submarino, que permite observar baixo a auga; Ángela Ruiz Robles, precursora do libro electrónico (ebook); Marion Donovan, inventora do cueiro impermeable, que mellorou o coidado dos bebés; Hedy Lamarr, que desenvolveu unha tecnoloxía que foi a base do GPS e do wifi; Celia Sánchez-Ramos, creadora do sistema de recoñecemento por córnea, importante para a seguridade e a saúde visual; Bette Nesmith Graham, inventora do típex, que permite corrixir erros ao escribir.
Despois de coñecelas, cada clase escolleu unha das científicas para traballar máis a fondo na aula.
Alumnado de 6º.
Alumnado de 5º.
Como resultado do aprendido, gravamos un vídeo para que as nosas familias puidesen compartir connosco todo o que descubrimos sobre estas mulleres tan importantes.
Para completar esta xornada tan especial, nas aulas de Infantil convertémonos en científicas e científicos por un día. Os experimentos realizados tiñan un elemento en común: a auga, protagonista de todas as nosas investigacións.
O obxecto que sobe sen meter a man. Propuxémonos descubrir como sacar un obxecto do fondo dun recipiente con auga sen utilizar a man. Fixemos varios intentos, pensando diferentes posibilidades e probando solucións, ata que descubrimos que ao facer xirar a auga co dedo se creaba un pequeno remuíño. Ese movemento empuxaba o obxecto e facía que se movese polo recipiente. Observamos así que a auga, cando está en movemento, pode exercer forza e desprazar elementos. Non era maxia, senón a forza do movemento.
A tensión superficial: cando a auga “se abre”. Espallamos polvos finos sobre a superficie da auga e comprobamos que flotaban grazas a unha fina “película” invisible chamada tensión superficial. Ao tocar a auga cun bastonciño mollado en lavavaixelas, os polvos separábanse rapidamente. Descubrimos que o xabón rompe esa tensión superficial e provoca ese sorprendente movemento.
Pintura máxica. Debuxamos sobre papel cunha mestura especial que, ao secar, parecía invisible. Cando pintamos por enriba con outra mestura, o debuxo apareceu coma por arte de maxia. En realidade, estabamos a observar unha pequena reacción química na que as substancias cambian de cor ao entrar en contacto.
A vela que “bebe” a auga. Foi un experimento que impactou moito ao alumnado. Ao cubrir cun vaso unha vela acesa colocada sobre auga, a chama apagouse e a auga subiu rapidamente cara ao interior, case como nunha pequena explosión. Descubrimos que a chama necesita osíxeno para arder; ao consumirse o aire do interior, o lume apágase e a auga sobe para ocupar ese espazo.
O noso sistema meteorolóxico: a nube e a choiva. Recreamos a choiva nun recipiente con auga e unha capa de escuma que representaba unha nube. Ao engadir pingas de colorante, observamos como a cor atravesaba a “nube” e descendía, igual que a choiva cae cando as nubes están moi cargadas de auga.
Ao través destas experiencias manipulamos, observamos, formulamos hipóteses e sacamos conclusións adaptadas á nosa idade. Descubrimos que a ciencia está presente no noso día a día e que aprender pode ser unha aventura chea de curiosidade e emoción. Porque a ciencia é para todas e todos… e quizais nas nosas aulas estean xa as científicas e científicos do futuro.
ECOPARQUE INFANTIL MAMÁ MARGARIDA.
Texto elaborado pola compañeira Belén González.
No noso colexio seguimos a descubrir que a natureza é unha gran mestra. A comezo de marzo, na horta escolar botou a andar un recuncho moi especial, un espazo adicado ás fresas, grazas ao alumnado de 6° E.I. xunto co equipo docente e coa axuda imprescindible do persoal de mantemento.
Entre todos deseñamos e preparamos o lugar onde medrarán. Foi un traballo en equipo no que removemos a terra e deixamos todo listo para plantar. As familias tamén participaron nesta pequena aventura verde traendo moitas plantas de fresa, polo que queremos expresar o noso máis sincero agradecemento pola súa colaboración e implicación. Unha vez preparado o espazo, puxémonos mans á obra. Plantamos as fresas con moito coidado, engadimos tamén algunhas herbas aromáticas e iniciamos os nosos primeiros semilleiros, que agora observamos cada día con curiosidade e ilusión.
Estas experiencias permítennos aprender e comprender o respecto pola horta de todas e todos grazas a coidados colaborativos. Con gran entusiasmo, puidemos observar o crecemento de cabazas, cabacíns, tomates, pementos e incluso algunhas fresas que aínda se mantiñan nas plantas do curso pasado.
VISITA Á II FEIRA CIENTÍFICA ESCOLAR SALESIANOS.
Alumnado de 4º.
Alumnado de 5º.
Alumnado de 6º.
