O 13 de febreiro alumnado de Bioloxía e Xeoloxía de 1º de Bacharelato, participou nun itinerario que nos levou a Ponferrada e a súa contorna. Esta actividade complementaria, organizada polo Seminario de Ciencias Experimentais, tiña entre outros obxectivos os seguintes:
– participar na sétima edición do Congreso de Jóvenes Expertos (de seguido CJE), organizado pola Fábrica da Luz (Museo da Enerxía de Ponferrada), o Ministerio para a Transición Ecolóxica e o Reto Demográfico (MITECO), a Universidade de León e a UNED.
– darlle a oportunidade ao alumnado de representar ao centro educativo e á cidade, presentando os seus traballos sobre o Obxectivo de Desenvolvemento Sustentable (ODS) 9, sobre industria, innovación e infraestrutura.
– pasar unha xornada lonxe da aula, compartindo experiencias con alumnado doutros centros e desfrutando dunha tarde ao ar libre, na contorna do Lago de Carucedo e do Monumento Natural de Las Médulas, no Bierzo.
A xuntanza dos participantes levouse a cabo no portón de acceso ao centro, á beira da N-120, ás 06:00 h da mañá. Por diante quedaba unha longa xornada, dado que ás 8:30 estabamos citados para a entrega de acreditacións para o congreso, no edificio de servizos da Universidade de León en Ponferrada. Unha avaría nunha das portas do transporte fixo que non puidéramos iniciar a marcha ata pasadas as 08:10 h, polo que nos incorporamos ao CJE arredor das 10:20 h. E como pode verse no cronograma, no primeiro bloque, tres das trece ponencias corresponderon ao alumnado do noso centro.
Ponencia de Saga Estévez Díaz e Manuel Vázquez Araújo: “ALTRI: perxuicio medioambiental ou beneficio económico”.
Ponencia de Manuel Deaño Santaya e Iker González Colmenero: “Residuos radioactivos”.
Ponencia de Sara Fernández Prado e Antón Rodicio López: “Terras raras, o corazón da transición sostible”.
Os pdf das tres presentacións están dispoñibles na sección Materiais Didácticos/CJE Ponferrada do blog.
Ao remate das trece ponencias e antes de continuar co segundo bloque tivemos un merecido descanso, no que a organización agasallounos cun surtido almorzo.
Ao cabo do segundo bloque, antes de rematar o CJE, tivo lugar a tradicional foto de grupo de todos os poñentes con docentes, autoridades e organizadores.
Podedes consultar a grabación íntegra do congreso na seguinte ligazón:
Para xantar desprazámonos no transporte ata o centro comercial O Rosal.
Arredor das 16:00 h voltamos a coller o transporte, e achegámonos ata a Casa do Parque de Las Médulas, en Carucedo (https://turisleon.com/lugares/casa-del-parque/, https://patrimonionatural.org/casas-del-parque/casas-del-parque/casa-del-parque-de-las-medulas, https://www.turismocastillayleon.com/es/naturaleza/casa-parque-medulas).
Luis, responsable da instalación, amosounos este equipamento localizado na contorna do Lago de Carucedo, cun relato no que destaca a influencia que temos os humanos na configuración da paisaxe, e como exemplos, a explotación romana de ouro e o propio Lago de Carucedo.
Se queredes saber máis convidámosvos a consultar o audiovisual do comunicador Isaac Moreno Gallo sobre minería romana, que podedes ver en https://www.rtve.es/play/videos/ingenieria-romana/mineria/5774118/, especialmente entre os minutos 49:20 e 55:45. Ou o seguinte clip da serie de RTVE Los Pilares del Tiempo: https://www.rtve.es/television/20240530/como-consiguieron-romanos-destruir-montanas-medulas-para-extraer-oro/16123000.shtml.
Chegamos a Ourense ás 18:50 h. Foi unha xornada de convivencia moi completa, cunha actividade académica diferente pola mañá e unha visita de interese pola tarde.
Ligazóns a novas na prensa:
https://www.heraldodeleon.es/album/el-bierzo/galeria-de-fotos/20260213105415073163.html
