O venres 16 de xaneiro, entre as 12:30 e as 13:20 h, alumnado de Bioloxía e Xeoloxía de 4º ESO e 1º BAC do centro tivo a oportunidade de seguir na Aula Magna a presentación do libro “Como se formou esta paisaxe? Xeoloxía de Galicia”.
A actividade divulgativa, organizada polo Seminario de Ciencias Experimentais, tivo como protagonista a Eduardo José González Clavijo, Xeólogo e coordinador dos Xeolodías a nivel estatal, autor desta interesante publicación. En NaturezAula temos a sorte de contar co seu excelente labor divulgativo, e grazas a súa compaña durante o curso, aprendemos de Xeoloxía en moitas das actividades.
Eduardo comezou a presentación facendo una reflexión sobre a a importancia da Xeoloxía, destacando como está a perder relevancia no Ensino Medio, as carencias resultantes en moitos estudos superiores, na investigación, a nivel divulgativo… e a trascendencia de manter este coñecemento para poder contar cunha sociedade formada e con capacidade de interpretación dunha manchea de fenómenos naturais relacionados.
Na presentación (o pdf está dispoñible na carpeta Materiais Didácticos da páxina de inicio do blog), hábilmente adaptada aos coñecementos dos asistentes, fixo referencia explícita a contidos traballados nas aulas e nos roteiros didácticos…
… explicando as motivacións que o levaron a facer realidade este proxecto editorial, da man de Baía edicións.
O colexio adquiriu algúns exemplares, que foron repartidos entre o alumnado para un mellor seguemento da actividade.
Ao rematar a charla, Eduardo atendeu todas as cuestións do alumnado, que nesta ocasión foron moitas e moi interesantes.
Unha vez máis, agradecemos a Eduardo a súa profesionalidade e o cariño co que participa activamente nas actividades de NaturezAula.
