Do 25 de agosto ao 8 de setembro, un grupo de 28 estudantes de 1º a 3º da ESO do noso colexio, xunto cunha mestra e unha monitora, participou nun programa en Dublín que combinou aprendizaxe de inglés con visitas á natureza, á historia e á cultura irlandesas.
Durante dúas semanas, os alumnos e alumnas gozaron dunha experiencia única en Dublín dentro dun programa de inmersión lingüística. Ademais de mellorar o seu inglés, convivindo con familias locais e asistindo a clases, tiveron ocasión de descubrir a riqueza natural e cultural da chamada “Illa Esmeralda”.
O 30 de agosto visitamos a vila costeira de Bray, ao sur da capital. Alí percorremos os seus cantís e o famoso Bray Head, unha formación rochosa de orixe paleozoica. A costa de Bray é coñecida polos seus estratos de cuarcita e xistos, que amosan a longa historia xeolóxica de Irlanda e forman parte do WicKlow Mountains Natinal Park.
O domingo 31 de agosto a excursión levounos ao castelo de Malahide, un dos mellor conservados do país. No seu recinto atopamos a Casa das Bolboretas, un espazo cuberto onde se poden observar máis de 20 especies de bolboretas tropicais en liberdade, co seu ciclo vital completo dende a eiruga ata a crisálida.
A visita completouse cos xardíns de Malahide, de máis de 9 hectáreas, que reúnen plantas ornamentais de todo o mundo, invernadoiros e un espazo de educación ambiental moi valorado en Irlanda.
O martes 2 de setembro tocou visita ao Trinity College de Dublín, onde ademais da coñecida biblioteca, o alumnado entrou no Museo de Ciencias Naturais. Entre as súas pezas máis impresionantes destaca o esqueleto dun megalocero (Megaloceros giganteus), tamén chamado “cervo xigante”. Este animal, extinguido hai arredor de 10.000 anos, podía acadar ata 2,1 metros de altura e uns cornos de máis de 3 metros de envergadura, sendo un símbolo da megafauna glaciar europea.
No mesmo museo observaron tamén unha sala con columnas feitas de diferentes mármores e pedras procedentes das canteiras irlandesas. Irlanda posúe unha longa tradición na extracción de pedra, con exemplos como o Kilkenny limestone (calcaria negra), o Connemara marble (verde con vetas), ou granitos de Wicklow e Mourne, que foron empregados tanto en construcións históricas como en monumentos contemporáneos.
O sábado 6 de setembro viaxamos ata a península de Howth, ao norte de Dublín, un porto mariñeiro rodeado de cantís espectaculares. Alí puideron observar focas grises (Halichoerus grypus) que se achegan á zona portuaria en busca de peixe. A costa de Howth destaca polos seus cantís de cuarcita, con formacións abruptas que ofrecen refuxio a aves mariñas como gaivotas, corvos mariños e araos, ademais de rutas de sendeirismo con vistas ao mar de Irlanda.
Para rematar, o domingo 7 de setembro, a excursión levounos a Kilkenny, coñecida como a “cidade de mármore negro”. Alí puideron descubrir a importancia xeolóxica do seu famoso limestone, unha calcaria escura con fósiles mariños de máis de 300 millóns de anos, que foi empregada na construción de igrexas e edificios históricos. A contorna de Kilkenny, ás beiras do río Nore, tamén é recoñecida polos seus ecosistemas fluviais e polo seu rico patrimonio natural.
A experiencia en Irlanda resultou moi enriquecedora, non só pola mellora do inglés grazas á inmersión diaria, senón tamén polo contacto coa historia, a xeoloxía, a biodiversidade e a cultura do país. Sen dúbida, unha viaxe inesquecible para aprender da natureza e da vida na Illa Esmeralda.
