O luns 28 de abril, entre as 11:40 e as 14:10 h, alumnado de 3º ESO, e alumnado de BX de 4º ESO, 1º e 2º BAC do centro tivo a oportunidade de seguir no Salón de Actos a Xornada ConCiencia sobre Cirurxía. Como ese día, durante a intervención do segundo poñente, sufrimos o apagón que deixou sen luz a toda a península, retomamos a actividade, co mesmo horario, o luns 19 de maio na Aula Magna do centro, desta vez para alumnado de BX de 4º ESO e 1º BAC.
A actividade divulgativa, organizada polo Seminario de Ciencias Experimentais do centro, tivo como protagonistas ao Dr. Borja Pérez Serrano, ao Dr. José Manuel Domínguez Carrera, á Drª. Inés Aldrey Cao e ao Dr. Iago Justo Alonso. Compartiron connosco as ponencias Innovacións tecnolóxicas no ámbito da podoloxía, Cirurxía robótica e futuro, Que fai unha moza coma min nun sitio coma este? E Trasplante de órganos abdominais, onde están os límites? A moderadora da mesa foi a Drª Marta Vázquez Lorenzo (Residente de Oncoloxía Radioterápica no CHUVI-Meixoeiro).
Manuel Gallego Fortes encargouse da xestión da tecnoloxía, de xeito que todo o sistema informático e audiovisual funcionara perfectamente. A charla divulgativa foi grabada para posteriormente compartir o mateiral audiovisual na canle de youtube do colexio.
O primeiro en intervir foi Borja, do que temos imaxes da sesión do día 28 de abril; na sesión do 19 de maio estaba a piques de coller un avión de volta dun congreso en Sevilla, polo que a súa charla foi unha grabación previa.
A continuación, José Manuel, do que dispoñemos dalgunhas imaxes previas ao apagón; outras son da sesión do día 19 de maio, na Aula Magna. Ao remate da súa presentación fixemos un breve descanso para estirar as pernas.
Iago, que saia de consulta no Hospital 12 de Outubro (Madrid), puido conectarse para abrir o segundo bloque compartindo a súa presentación por videoconferencia. Ao rematar a súa intervención, alumnado e poñentes compartiron con el preguntas e comentarios.
A continuación foi o turno de Inés, encargada de pechar as presentacións.
Ao rematar as presentacións, o alumnado tivo ocasión de facer algunhas preguntas, e os poñentes estableceron un animado coloquio sobre as charlas e o tema da mesa redonda. As presentacións dos catro poñentes están dispoñibles na sección Materiais Didácticos/Xornadas ConCiencia do blog.
Desde o Seminario de Ciencias Experimentais queremos agradecer a Jose Álvarez, Manuel Gallego, Juan Cao e Yolanda Pérez o traballo levado a cabo para que todo estivera a punto; aos poñentes pola súa colaboración e dispoñibilidade, especialmente polo esforzo realizado ao adaptar contidos para as súas charlas; e á moderadora pola súa implicación co noso proxecto. Agardamos poder seguir contando co bo facer de todas e todos e que sexamos quen de manter a iniciativa de aportar no eido da divulgación científica.
