Texto de Cristina López. Fotografías de Cristina López e Google.
Como cada ano, o noso centro educativo organizou unha viaxe de Inmersión Lingüística no estranxeiro. Desta volta, o destino elixido foi Brighton, na costa sur do Reino Unido (UK), entre o 25 de agosto e o 8 de setembro. No programa participaron 18 mozos e mozas de 2º, 3º e 4º da ESO dos nosos centros educativos de Ourense e Cambados, acompañados por unha mestra de Ourense e unha monitora da empresa de xestión das viaxes, Language Kingdom, Licenciada en Bioloxía e Bioquímica no Sheffield Children’s Hospital.
Ademais doutros espazos e centros de interese visitados, destacamos a excursión do 30 de agosto á área de South Downs, en East Sussex, onde se atopan os cantís de creta coñecidos como “Seven Sisters”, entre as localidades de Seaford e Eastbourne, ao sur de Inglaterra. A pesar do tempo, estes cantís seguen tendo unha cor branca brillante, xa que se están a erosionar de xeito natural, sen tomar medidas para evitalo (como acontece noutros das mesmas características, por exemplo os de Dover, un pouco máis ao leste, protexidos por vexetación, o que fai que se volten verdes).
Este complexo orográfico ubicado dentro do Seven Sisters Country Park, son os restos de vales secos na creta, que, pouco a pouco están a ser erosionados polo mar. Estas “Sete Irmás”, de oeste a leste, comezan en Cuckmere Haven. Os picos dos cantís e as caídas entre eles noméanse de xeito individual. Son sete colinas, cunha octava que está a ser creada pola erosión do mar. O camiño de South Downs (South Downs Way), que puidemos percorrer, discorre ao longo do borde dos cantís, seguindo un curso moi sinuoso.
Alí puidemos coñecer a flora e fauna autóctona, coma a Lysandra bellargus (a bolboreta Adonis, de ás marróns e azuis), Alauda arvensis (alondra), Tringa totanus (archibebes), Charadrius (chorlito)… entre outras especies, así coma a Papaver cambricum (amapola amarela) e a Ophrys apifera (orquídea abella, cuxo distintivo é unha mimetización que as fai aparentar o tipo de abella que as poliniza).
