O luns 25, entre as 16 e as 16:45 h, alumnado de 1º de ESO que participa no Programa de Altas Capacidades (AACC) do centro levou a cabo unha sesión de contacontos dirixida ao alumnado de 1º de Ensino Primario (EP), reunido na Aula Innova.
Esta actividade, coordinada polo profesorado de 1º de EP, o Departamento de Orientación e o Programa Ambiental NaturezAula, tiña como obxectivos, entre outros, a posta en valor da convivencia entre distintas etapas formativas, os hábitos de alimentación saudable, o fomento da lectura e a achega de valores como o respeto, a amizade e o traballo en equipo.
Inés García e Martín Rodicio, de 1ºA de ESO, Elba Feijóo, de 1ºB, e Gonzalo Cantón de 1ºC, prepararon e ensaiaron durante varias sesións a posta en escea do conto “A mellor sopa do mundo”, de Susanna Isern e Mar Ferrero (OQO editora).
O alumnado de 1º de EP participou activamente da actividade, achegando algúns dos ingredientes á ola, cantando e desfrutando do reparto da sopa.
Para rematar, empregando ceras de cores, escribiron os ingredientes sobre distintos papeis, tamén de cores.
