A tarde do venres 12 de abril varios docentes achegámonos ata o Edificio Politécnico do Campus Universitario da Universidade de Vigo en Ourense para visitar a exposición “O herbario de Rosalía”. https://www.uvigo.gal/es/universidad/comunicacion/agenda/exposicion-herbario-rosalia.
A visita dáballe continuidade á Xornada ConCiencia celebrada no centro escolar o 25 de maio do pasado curso, na que a Profesora María López-Sandez nos visitou para falarlle ao alumnado de 1º de ESO sobre “Os nomes da natureza: Proxectos interdisciplinares entre as Ciencias Naturais e a Literatura ao través do Herbario de Rosalía de Castro”, charla integrada na oferta formativa do programa “A Ponte entre o Ensino Medio e a USC”, da Universidade de Santiago de Compostela. https://naturezaula.salesianosourense.com/2023/05/os-nomes-da-natureza.
A exposición, instalada no vestíbulo do Edificio Politécnico, contaba con 6 pósters con texto e 40 reproduccións das láminas do Herbario de Rosalía, recollidas no libro do mesmo título publicado pola propia María López-Sandez en colaboración con María Isabel Fraga Vila e Miguel Fraga Vila. Asemade, acompañaba con imaxe e son un monitor instalado á beira da mesma.
