O xoves 14 de decembro Lorena Salgado, Product Marketing Manager de APLANET (https://aplanet.org/es), visitou a aula de 1ºB de bacharelato para falarlle ao alumnado de Bioloxía e Xeoloxía da Igualdade de xénero en tempos de IA.
A charla foi a segunda Xornada ConCiencia do curso 2023-2024, dándolle continuidade á anterior na preparación e motivación do alumnado para o Congreso de Jóvenes Expertos que se vai celebrar en Ponferrada o 16 de febreiro de 2024. Nesta ocasión sumáronse os dous alumnos de altas capacidades de 4º de ESO que tamén participan neste proxecto.
Alumnado que vai participar coas súas presentación sobre o ODS 5 no CJE, posando con Lorena e Gustavo para esta fotografía.
Lorena falou do uso profesional de ChatGPT, destacando o sesgo de xénero asociado con esta ferramenta, que perpetúa os estereotipos de xénero e a falta de diversidade en Tecnoloxía. Durante a súa presentación (dispoñible na sección Xornadas ConCiencia da carpeta Materiais Didácticos deste blog; https://drive.google.com/drive/folders/1LDgmz89Y650p578EEEzO57Q4GDWu8JI_) tamén fixo referencia á falta de conciencia ao programar, aos impactos na sociedade (emprego e contratación, publicidade e medios, productos e servizos, atención médica…) e as estratexias de mitigación.
Para rematar a súa presentación deixou a disposición da comunidade educativa unha manchea de recursos bibliográficos, que ben seguro serán de utilidade na elaboración dalgúns dos traballos a presentar no CJE.
Agradecemos a Lorena a súa dispoñibilidade e a profesionalidade á hora de comunicar e divulgar sobre o Obxectivo de Desenvolvemento Sostible 5.
