O venres 27 de outubro pola mañá 35 alumnas e alumnos de Bioloxía e Xeoloxía de 4º de ESO, acompañados por dous docentes, visitamos a mostra de fotografía de National Geographic, instalada pola Fundación La Caixa nos Xardíns do Posío (en colaboración co Concello de Ourense). Os detalles da exposición poden consultarse en https://www.ourense.gal/es/evento/de-polo-a-polo-arte-en-la-calle.
O alumnado, acompañado polos docentes, percorreu a pé o camiño que separa o centro educativo da ubicación da exposición, saíndo do colexio ás 10:15 h. Unha vez nos Xardíns do Posío, tiveron preto dunha hora para desfrutar da calidade das imaxes, facer fotografías e tomar notas para poder preparar cuestións que máis tarde foron enviadas aos docentes. Estes levarán a cabo unha selección desas cuestións, que compartirán no drive da asignatura, e terán protagonismo no seguinte cuestionario de avaliación da asignatura, dado que os contidos presentados na exposición están presentes no currículo de Bioloxía e Xeoloxía de 4º de ESO, asemade de ser de notoria actualidade.
Os asistentes puideron facer un percorrido desde o Ártico ata a Antártida, ao través de imaxes tomadas en “puntos quentes”, ecorexións terrestres recoñecidas pola súa elevada biodiversidade e o alto nivel de endemismos, en moitos casos gravemente ameazados pola actividade humana.
O regreso, polo mesmo camiño, foi tamén a pé, estando de volta no colexio ás 12:30 h, para que o alumnado puidera incorporarse á quinta sesión de clase da mañá.
