O xoves 25 de maio, entre as 12:30 e as 14:10 h, alumnado de 1º de ESO asistiu á charla de María López Sández na Aula Magna do CPR Plurilingüe María Auxiliadora de Ourense.
María López Sández é profesora da Área de Didáctica da Lingua e a Literatura, e Vicedecana da Facultade de Ciencias da Educación da Universidade de Santiago de Compostela. A charla, co título “Os nomes da natureza: Proxectos interdisciplinares entre as Ciencias Naturais e a Literatura ao través do Herbario de Rosalía de Castro”, está integrada na oferta formativa do programa “A Ponte entre o Ensino Medio e a USC”, da Universidade de Santiago de Compostela.
A poñente levou a cabo unha presentación sobre o traballo realizado en colaboración con María Isabel Fraga Vila e Miguel Fraga Vila, que deu lugar á publicación do libro Nasín cando as plantas nasen; O herbario de Rosalía. Tamén comentou algúns detalles sobre a exposición do Real Jardín Botánico de Madrid.
Durante a intervención fixo partícipe ao alumnado, dándolle a oportunidade de facer lecturas breves seleccionadas de fragmentos das obras de Rosalía de Castro, recollidas nos pregos do herbario. Unha manchea de curiosidades chamou a atención dos participantes na charla, como cando comentou que o término rumorosos, dos versos de Pondal, facía referencia aos piñeiros; ou que cabía a posibilidade de que Rosalía confundira as aciñeiras coas sobreiras (estas últimas ben presentes no val do río Sar ao seu paso por Compostela).
Agradecemos a María López Sández o esforzo e a boa dispoñibilidade.
