Mañá sábado, 22 de abril, é o Día da Terra. Celébrase desde 1970 para lembrar que é o noso fogar e temos a obriga de coidalo para xestionar e conservar os seus recursos naturais para as futuras xeracións. Un dos obxectivos deste día é xerar conciencia e sensibilizar á poboación sobre os problemas medioambientais que afectan ao planeta, fomentando o desenvolvemento sustentable, que leve a un equilibrio entre as necesidades económicas, sociais e ambientais. Mañá tamén se celebra o Día Mundial da Creatividade e a Innovación. Para os integrantes do Seminario de Ciencias Experimentais do centro son efemérides significativas que de seguido van ter se cadra, máis relevancia, porque van coincidir coa materialización dun proxecto iniciado en outubro de 2021. Daquela xurdiu a idea de mellorar a recollida de lixo nos espazos exteriores do centro (pórticos, pistas deportivas, xardíns…), e comezou a andadura dun plan de ordenación e sinalización dos recipientes adicados á recollida dos refugallos (que nun cole coma o noso non son poucos, e non sempre acaban nas tradicionalmente denominadas papeleiras).
Logo dunha manchea de bocetos e planos, en marzo de 2022 acadamos os deseños definitivos dos vinilos que se ían colocar para indicar que refugallo tiña que botarse en cada recipiente.
Pero non foi ata ben iniciado o curso 2022-2023 cando comezamos a programar a instalación. Hoxe, unha representación do alumnado de todos os niveis foi protagonista, xunto cos seus educadores, da pegada dos últimos vinilos nos recipientes correspondentes, en distintas localizacións dos espazos exteriores. Cada un deles xa estaba equipado con bolsas coas cores que lle correspondían, para facilitar aínda máis a identificación do tipo de refugallo que se debe depositar.
Colocación dos vinilos en Primaria.
Colocación dos vinilos en Infantil.
Colocación en ESO-BAC.
Desde o Seminario de Ciencias Experimentais queremos agradecer o labor do persoal de servizos e limpeza e a súa implicación no proxecto; tamén ao equipo directivo do centro, que apoiou a iniciativa desde o inicio, sendo conscientes de que os cambios en dinámicas como esta non sempre son doados, nin teñen resultados inmediatos.
Agardamos que toda a comunidade educativa se faga eco desta iniciativa e asuma a súa responsabilidade á hora de depositar os distintos refugallos nos espazos exteriores do centro. O noso planeta ben o merece, e non costa nada separar o lixo, sobre todo se temos en conta a cantidade de papeleiras (que a partir dagora serán destinatarias de moito máis que papel) dispostas nestes espazos.
