Durante os dous primeiros trimestres o alumnado de Ensino Infantil e Ensino Primario levou a cabo actividades moi variadas, a meirande parte delas relacionadas coa Horta Escolar Mamá Margarida.
Rincón de Outono.
Os nenos e nenas de 4º de Infantil fixeron coas súas familias manualidades vencelladas ao outono que despois trouxeron á escola e expuxeron diante de todos os seus compañeiros.
Manualidade de Outono.
As nenas e nenos de 4º de Infantil recolleron na horta escolar castañas e follas coas que fixeron unha caixiña para levar a casa. As nenas e nenos de 5º de Infantil, con canutos de papel hixiénico, fixeron cogumelos de outono.
Plantar.
No mes de novembro, aproveitando os momentos nos que a choiva nos deu tregua, plantamos no noso horto escolar leitugas, coliflores, brócolis, repolos.
Plantar aromáticas.
Durante o mes de novembro o alumnado de 4º de Primaria plantou repolo e herbas aromáticas.
Plantación de landras e castañas.
O alumnado de 1º, 2º, e 3º de Primaria levou a cabo un viveiro de landras e castañas.
Carteis da horta.
O coidado da nosa horta é labor de todo o alumnado do noso cole e grazas a el aprendemos moito sobre as plantas e os cultivos. Por iso, é importante que teñamos unhas pautas e normas a cumprir cando visitamos a horta.
Con ese obxectivo, o alumnado de 5º de Primaria deseñou, empregando o Chromebook e as ferramentas dixitais, estes carteis informativos cos que actualizamos os xa elaborados en cursos pasados no proxecto de Plurilingüismo “Vegetable garden”. O alumnado de 6º de Primaria foi o encargado de colocar os carteis na horta.
Arrancar as herbas.
Comezamos o ano novo, sen esquecernos da nosa Horta Escolar, e durante a visita de hoxe estivemos a arrancar a man as herbas que están medrando arredor das que plantamos o pasado trimestre e comprobando se algunha das nosas plantas necesita algún coidado especial. Estar en contacto coa terra, ademáis de relaxarnos moito, axúdanos a valorar o traballo realizado e a traballar a espera e a paciencia para obter bos resultados.
Plantar.
Para rematar esta manchea de actividades, os máis peques do colexio disfrutaron moito na horta escolar plantando cebolas, leitugas e repolo.
