ELECTRICIDADE QUE APAGA VIDAS - AVES ELECTROCUTADAS

O mércores 25 de xaneiro alumnado de Bioloxía e Xeoloxía de 4º de ESO asistiu á conferencia da coordinadora de Ecoloxistas en Acción Ourense, Nancy Blanco, na Aula Magna do centro.

O obxectivo da charla era achegar ao alumnado a realidade das aves que cada ano morren electrocutadas ao colisionar ou apoiarse nalgún punto da rede eléctrica.

A morte de aves por electrocución é un problema global que se ten agravado pola demanda de enerxía en moitas rexións do mundo, pero sobre todo porque se teñen implementado liñas eléctricas sen medidas de seguridade en lugares que ata fai pouco eran áreas naturais de paso ou habitadas por poboacións de aves e outras moitas especies de gran valor ecolóxico. En todo o territorio do estado español é a causa da morte de centos de milleiros de aves.

Nancy amosou ao alumnado un audiovisual levado a cabo por Ecologistes en Acció País Valenciá, no que se pon de manifesto esta realidade.

A pesar de que esta problemática medioambiental fai moitos anos que está recollida en convenios internacionais e directivas da Unión Europea, así como na normativa sobre liñas eléctricas do estado, as medidas antielectrocución no se están a aplicar de xeito significativo.

Agradecemos a Nancy o seu compromiso co medio ambiente e a dispoñibilidade para dar a charla