O 7 de maio, sábado, levouse a cabo o Xeolodía de Ourense 2022, unha iniciativa a nivel estatal da S.G.E. (Sociedade Geológica de España) en colaboración con outras entidades. Un grupo de docentes do centro participou na mesma, na contorna da localidade de A Barxa, en A Gudiña. A responsable da actividade foi Irene Pérez Cáceres, investigadora posdoutoral do Departamento de Xeoloxía da Universidade de Salamanca, que levou aos participantes por unha pequena ruta co obxectivo de dar a coñecer algunas curiosidades de distintas disciplinas da xeoloxía, como minería, tectónica, petroloxía e xeomorfoloxía. Asemade, plantexaba unha viaxe no tempo xeolóxico ao través das sucesivas paradas, así como coñecer algunhas aplicacións das ciencias xeolóxicas.
Na imaxe da esquerda, localización do Xeolodía de Ourense 2022 e localización das paradas e do aparcadoiro.
O percorrido comezou dando a coñecer aos asistentes unha falla de 300 millóns de anos, do remate da Era Paleozoica, como consecuencia da deformación da oroxenia Varisca.
O grupo desprazouse ata o meandro do río Pentes para descubrir os segredos da mina de Valgrande, na que houbo interese desde comezos do século XVIII ata 1960 polos elementos estaño e wolframio, que estaban incorporados nos minerais metálicos dentro dos filóns de cuarzo, e asociados ao emprazamento do granito. Os filóns de cuarzo conteñen minerais metálicos como casiterita, arsenopirita e pirita; e wolframita e hidróxidos de ferro como minerais accesorios.
Durante toda a mañá os asistentes tiveron oportunidade de observar diferentes tipos de rochas, así como o montefurado que desvía o cauce do río e permitía acceder aos depósitos de gravas do meandro do Pentes coa intención de lavalos e atopar pébedas de ouro e posiblemente doutros metais pesados como a casiterita (estaño). Este túnel de deriva ten entre 30 e 35 metros de lonxitude, uns catro metros de ancho e entre 2 e 3 metros de altura, e deixa seco un treito de río de menos de 300 metros de longo. O aproveitamento do desvío da auga seguiu séculos máis tarde coa construcción na saída do túnel do muíño das Canteiras, para aproveitar a forza da auga e mover as moas do muíño hidráulico.
Pola tarde, o grupo de docentes do centro desprazouse ata a localidade de Requejo, en Sanabria, para visitar o Bosque do Tejedelo, unha singular formación vexetal na cara norte da Serra Gamoneda (moi preto do Porto de Padornelo) que conta con máis de cen teixos, Taxus baccata, milenarios.
