O alumnado de 1º de ESO do noso centro tivo a oportunidade de percorrer o tramo Ponte Vella-Santa Mariña do sendeiro periurbano de Ourense. O luns 2 foi a quenda de 1ºC, na compaña de Gustavo e Xulio; Gustavo e Maika acompañaron a 1ºA, o luns 9, e a 1ºB, o luns 16. Esta actividade levouse a cabo entre as 9 e as 17:30 h, grazas a coordinación dos docentes do Seminario de Ciencias Experimentais e do Seminario de Xeografía e Historia.
Ao longo do roteiro fixeron unha manchea de paradas de interpretación, todas elas recollidas no caderno de actividades elaborado polos docentes.
Na cunca do Loña, o alumnado recolleu datos sobre o estado dos muíños, a vexetación de ribeira e as características da Ponte Medieval.
A continuación avanzaron pola senda do Loña ata chegar a Mende, onde logo dun breve descanso para repoñer forzas comezaron o ascenso polo Camiño Real, que os levou ata Santomé.
No miradoiro de Santomé, con moi boa visibilidade, parada para apreciar a depresión do val do Miño ao seu paso por Ourense e a paisaxe de replanos morfolóxicos, cos seus niveis de cumio, e as diversas unidades diferenciadas de poboamento e actividade humana, cada volta máis intensa segundo nos achegamos ao fondo do val.
Logo, interpretación do patrimonio histórico e natural nas distintas seccións do Castro de Santomé.
A natureza da contorna, espléndida nesta época do ano.
Outro descanso no núcleo rural de Ceboliño, onde puidemos ver o único cartel informativo do noso proxecto que segue en pé, á beira dos instalados polo Concello de Ourense…
… antes de seguir cara Montealegre.
1ºC continuou camiño ata Santa Mariña, para coller o bus urbano de volta ao centro da cidade. 1ºA descendeu ata o Parque Botánico de Montealegre, e desde alí á cidade.
Con estes roteiros pechamos o ciclo programado polo centro co obxectivo de que o alumnado de ESO e Bacharelato teña a oportunidade de descubrir os valores ambientais e patrimoniais da contorna. As visitas do curso 2021-2022 estiveron distribuídas do seguinte xeito:
As seguintes imaxes corresponden ao roteiro do alumnado de 1ºB, acompañado por Maika e Gustavo. Levárono a cabo o 16 de maio, chegando ata Santa Mariña.
