O 17 de febreiro alumnado de Cultura Científica de 1º de Bacharelato participou nun itinerario que nos levou a Ponferrada e a súa contorna. Esta actividade complementaria, organizada polo Seminario de Ciencias Experimentais, tiña entre outros obxectivos os seguintes:
– participar na terceira edición do Congreso de Jóvenes Expertos (de seguido CJE), organizado pola Fábrica da Luz (Museo da Enerxía de Ponferrada), o Ministerio para a Transición Ecolóxica e o Reto Demográfico, a Universidade de León e a UNED.
– darlle a oportunidade ao alumnado do centro de presentar o seu traballo sobre Cambio Climático no CJE.
– pasar unha xornada lonxe da aula, compartindo experiencias con alumnado doutros centros e desfrutando dunha tarde o ar libre, na contorna do Monumento Natural de Las Médulas.
A xuntanza dos participantes levouse a cabo no portón de aceso ao centro, á beira da N120, ás 6 da mañá. Por diante quedaba unha longa xornada, dado que ás 8:30 estabamos citados para a entrega de acreditacións para o congreso, no Edificio de servizos da Universidade de León, en Ponferrada.
O CJE comezou puntual, e seguiu o horario que podedes consultar a continuación.
As autoridades e os participantes foron ocupando os seus asentos…
… e Laura Martín Murillo, Directora do Instituto para a Transición Xusta (Ministerio para a Transición Ecolóxica e o Reto Demográfico), foi a encargada de facer a charla inaugural do congreso.
De seguido comezaron as ponencias…
… e ao remate do primeiro bloque (oito ponencias) os presentes tiveron a oportunidade de facer cuestións e aclaracións sobre os temas tratados.
Antes de continuar co segundo bloque tivemos un merecido descanso, no que a organización agasallounos cun máis que ben surtido almorzo…
… mentres as autoridades atendían aos medios de comunicación.
Durante o segundo bloque (outras oito ponencias) Mario López e Manuel Cortiñas tiveron ocasión de presentar o seu traballo en representación do noso centro. A continuación podedes ver a súa presentación:
Ao rematar o segundo bloque, os presentes tamén tiveron a oportunidade de facer cuestión e aclaracións sobre os temas tratados; mesmo os nosos representantes foron interpelados para defender algún dos datos presentes na súa ponencia.
Antes de rematar o CJE tivo lugar a entrega de diplomas e premios e a tradicional foto de grupo de todos os poñentes con autoridades e organizadores.
Podedes consultar a grabación íntegra do congreso, emitida en directo o 17 de febreiro, na seguinte ligazón:
Ligazóns a novas na prensa:
Logo de xantar desprazámonos no transporte ata o aparcadoiro de Orellán, desde onde camiñamos ata a galería e o miradoiro do mesmo nome.
Visitamos a galería de Orellán, onde o xeólogo Eduardo González Clavijo (que está a investigar sobre a minería romana) impartiu una maxistral miniclase sobre o terreo na que nos falou das distintas teorías existentes en relación ao modelo de explotación deste impresionante entorno.
Ao sair da galería pasamos un ratiño agradable no miradoiro, desfrutando da paisaxe e das indicacións de Eduardo. Se queredes saber máis convidámosvos a consultar o audiovisual sobre minería romana que podedes ver na seguinte ligazón, especialmente entre os minutos 49:20 e 55:45: https://www.rtve.es/television/20220105/ingenieria-romana-minas/2069384.shtml.
Dando un agradable paseo voltamos ao aparcadoiro, onde agardaba o transporte. De camiño a Ourense paramos antes de Salas da Ribeira, para que Eduardo nos explicara como se produciu un deslizamento de calizas á altura de Pardollán, e as consideracións xeodinámicas a ter en conta á hora de levar a cabo obras públicas, como no trazado ferroviario ou os encoros desa zona.
Unha xornada de convivencia moi completa, cunha actividade académica diferente pola mañá e visitas a varios lugares de interese pola tarde.
