O VOLCÁN DE CUMBRE VELLA.

O venres 17 de decembro, entre as 13:20 e as 14:00, alumnado de Bioloxía e Xeoloxía de 4º de ESO e alumnado de 1º de Bacharelato do centro tiveron a oportunidade de seguir nas súas aulas, ao través de Google Meet, a segunda Xornada ConCiencia deste curso.

A actividade divulgativa, organizada polo Seminario de Ciencias Experimentais do centro, tivo como protagonista a David Calvo Fernández, vulcanólogo lucense do Centro Nacional de Volcanología. Compartiu connosco a aproximación a pé ao cráter do Cumbre Vella, cando se achegaba ao mesmo cos seus compañeiros do INVOLCAN (Instituto Volcanolóxico de Canarias).

Ese mesmo día La Voz de Galicia recollía a nova do posible final da erupción (https://www.lavozdegalicia.es/noticia/espana/2021/12/16/tremor-volcan-sigue-minimos-palma-tercer-dia-consecutivo/00031639645758031222761.htm).

O vulcanólogo fixo unha completa introdución das tarefas de investigación que o INVOLCAN e outros grupos científicos están a levar a cabo na illa de La Palma, para dar paso ás cuestións do alumnado, entre as que se recolleron as seguintes:

  • En cantos proxectos e volcáns traballaches relacionados co teu traballo? de Mario López.
  • Como é a experiencia ao traballar á beira dun volcán? de Manuel Cortiñas.
  • Como funcionan as alertas fronte a actividade dun volcán? Pódese prever sempre coa mesma antelación? de Manuel Carracedo.
  • É posible que aumente a actividade volcánica a partir deste punto da erupción? Poderíase producir outra erupción noutra apertura que xurdira na superficie da illa? de David Valcárcel.
  • Que tivo que estudar para ser vulcanólogo, ou para adicarse ao estudo dos volcáns? Poderían aparecer en Canarias novas illas a raíz das explosións? Como é o día a día dun vulcanólogo cando non está nunha erupción? de Clara Garrido.
  • Escoitei sobre a posibilidade dun afundimento de parte da illa. É iso posible na situación actual do volcán? Canto se pode prolongar esta situación? de Luis Rafael Muñoz Núñez.

David Calvo contestou a todas as cuestións de camiño ao borde do cráter, mentres amosaba o extenso campo de piroclastos sobre o que camiñaban, destacando a calor e o intenso cheiro que acompañan a calquera das expedicións que levan a cabo para tomar mostras e monitorear ao volcán. Deste xeito fan un seguemento exhaustivo do mesmo, o que lles permite ofrecer valoracións baseadas no estudo científico, achegando a realidade da erupción á sociedade.

O alumnado seguiu con atención a charla, prestando atención ás respostas do vulcanólogo.

Queremos agradecer a David Calvo o esforzo levado a cabo para compartir connosco esta experiencia didáctica. Como ben nos comentaba, somos uns privilexiados por ter acceso a esta visión do volcán, e agardamos que unha vez que finalice a erupción os afectados pola mesma poidan recuperar a normalidade o antes posible, coa colaboración da sociedade e das autoridades.

© 2021 Salesianos Ourense.