Aproveitando a oportunidade que nos brinda o ECO-RETO de novembro, no proxecto NaturezAula do CPR Plurilingüe María Auxiliadora de Ourense retomamos unha das nosas actividades “históricas”, o miniviveiro de árbores autóctonas.
Comezamos a actividade do mesmo xeito que levamos a cabo desde o curso 2014-2015. Nesta ocasión o alumnado de 1º de ESO participa activamente da proposta educativa do Seminario de Ciencias Experimentais, desenvolvendo todo o proceso que se recolle a continuación:
1.- Recolección de landras (ou outras sementes) no campo:
Este é un paso esencial, xa que as landras deben ter un grao elevado de calidade para que poidan xerminar. Para que esta selección sexa excelente débense seguir os seguintes pasos:
2.- Iniciación do xerminado.
Sen ningunha dúbida esta é a parte máis importante de todo o proceso.
Para xerminar a semente hai moitos métodos, pero nós utilizaremos o seguinte:
Cóllese un bo anaco de algodón que se colocará na base do envase de iogur traído da de casa. Teremos que asegurarnos de que cobre ben o envase e que teña un grosor bo (menor a un centímetro).
Despois introduciranse dúas landras dentro. É conveniente que estean tombadas.
Unha vez colocadas as landras, deberase poñer un algodón, máis ou menos do mesmo grosor e tamaño, para cubrilas.
A continuación haberá que humedecer o envase. Non fará falta botar unha gran cantidade de auga. Terase que volver humedecer unha vez que estea seco.
3.- Plantar a semente.
Unha vez xerminada a landra débese plantar inmediatamente para así incrementar as posibilidades de vida futura. O mellor sitio para plantar a semente é o brick de leite.
Debemos botar terra enriquecida ata a metade do sementeiro. Despois faremos un pequeno foxo no medio para meter a pequena raíz na terra. Cando estea metida e a landra repousando cubriremos o sementeiro ata arriba. Repetirase este proceso con todas as landras xerminadas.
Á hora de regar sobrará con facelo en cada sementeiro unha vez por semana con moi pouca auga. Hai que perforar buracos nos lados. preto do fondo, para que a auga poida correr.
A landra botará raíz durante o inverno, e na primavera teremos un pequeno gromo verde.
Para completar o ECO-RETO, no apartado de investigación, a proposta ao alumnado pasaba porque identificaran as especies silvestres autóctonas máis comúns da nosa contorna, empregando a aplicación Arbolapp (deseñada polo CSIC, e á que teñen acceso ao través dos seus dispositivos Chromebook). Esta ferramenta permitirá que o alumnado acade algún ou varios dos seguintes obxectivos:
Chamamos a esta actividade “Quen é quen-botánico?” Como a época do ano non permite a identificación pola folla en moitas especies, estamos a empregar distintos documentos que facilitan a consecución dos obxectivos entre o alumnado, mellorando a capacidade de identificación visual, o que lles permite sacar o máximo rendemento á aplicación Arbolapp, empregando os dous tipos de busca posibles que pon a súa disposición a aplicación: guiada (dicotómica) e aberta.
A aplicación Arbolapp permitiranos seguir traballando no segundo e terceiro trimestre tanto nos xardíns do centro como durante os roteiros didácticos polo sendeiro periurbano. Asemade, a actividade terá continuidade nos vindeiros cursos facendo posible o uso de ferramentas cada vez máis específicas, como claves dicotómicas de maior complexidade (pódese consultar a que está dispoñible na sección Materiais Didácticos do noso blog).
