O venres 21 de maio o alumnado de 4º de Ensino Primario participou, acompañado polos seus titores, nunha excursión para coñecer o curso natural do río Loña desde a súa desembocadura, no río Miño, ata o encoro de Castadón.
Para chegar á desembocadura do Loña no Miño percorreron a beira esquerda deste último pola senda peonil habilitada que pasa ao carón do noso centro educativo.
Os participantes continuaron pola senda peonil do Loña, para chegar á Ponte Medieval situada no camiño vello que une os núcleos rurais de Mende e Velle, unha fermosa ponte dun único arco asentado sobre bolos graníticos da que temos unha primeira referencia no ano 1238. Esta ponte, con moita probabilidade, substituiu a outra anterior, romana, construida en madeira ou pode que en pedra, que daría servizo á vila galaico-romana de Santomé. O seu arco, lixeiramente apuntado, ten unha luz de 12,87 metros. A rampa, empinada, é bastante estreita, de 3,60 metros, e leva muros de acompañamento. A pequena inscrición nunha dovela e a data de 1238 suxiren a época de construción cara comezos do s. XIII, con varias reparacións posteriores. No ano 1969 o Concello de Ourense levou a cabo unha primeira consolidación para evitar a súa ruina, e no 1988 acométese a última e máis relevante, recuperándo a ponte para o tránsito peonil.
Deixando atrás a Ponte Medieval, a senda do Loña levou aos participantes ata as inmediacións do CPI José García García, en Mende, onde tiveron ocasión de recuperar forzas coa merenda.
Esta ruta de sendeirismo pola beira do río, permitiulles estudar o percorrido e desfrutar da contorna natural próxima á cidade.
